Frábær vinnustaður verður enn betri

Nú um mánaðarmótin voru fyrstu rýmin í Vesturhúsi Orkuveitunnar að Bæjarhálsi tekin í notkun eftir breytingar. Engin starfsemi hefur verið í hluti húsnæðis Orkuveitunnar eftir að mygla kom þar upp. Við tóku endurbætur á húsnæðinu sem nú er lokið rúmum 10 árum eftir að myglunnar varð fyrst vart.

Óhætt er að segja að verkefnið hafi verið mikil áskorun enda kom í ljós galli í útveggjum hússins og ljóst að veggina þurfti að fjarlægja. Það var gert, nýir settir í staðinn og allar 6 hæðir þess voru endurskipulagðar og innréttaðar að nýju.

Heildarkostnaður framkvæmdanna er 5.980 milljónir króna sem er 7,3% yfir samþykktum áætlunum verksins.

Grettir Haraldsson hefur stýrt verkefninu fyrir hönd Orkuveitunnar frá árinu 2016.

„Fyrir mig persónulega er afar ánægjulegt að sjá verkefnið loksins vera að klárast. Þetta eru auðvitað háar upphæðir í heildina en verkefnið er líka stórt og flókið. Eins og við vitum getur ýmislegt komið upp í svona flóknu verkefni sem er í gangi yfir svo langt tímabil en ég er mjög ánægður enda hefur tekist afar vel til,“ segir Grettir.

Tekist að skapa heilnæman og góðan vinnustað

Hann segir verkefnið einstakt enda flókið að skipta um útveggi á svo stórri byggingu. „Það er ótrúlegur fjöldi fólks sem hefur komið að þessu og ég er ánægður með niðurstöðuna. Markmiðið var að laga gallaða húsið og skapa heilnæman og góðan vinnustað þar sem fólki líður vel. Það hefur tekist.“

Grettir segir eina helstu áskorunina hafa verið að blanda saman framkvæmdasvæði þar sem verið var að hífa stálbita, kjarnabora og framkvæma allskyns hávaða á sama tíma og skrifstofufólk var við vinnu.

„Starfsfólk Orkuveitunnar fór ekki neitt. Það var bara ennþá hinum megin við vegginn að vinna sína vinnu. Þetta hefur allt saman gengið framar vonum og fólk hefur sýnt mikla þolinmæði.“

Framkvæmdaaðilar hafi gert vel

Sævar Freyr Þráinsson, forstjóri Orkuveitunnar, tekur undir orð Grettis og segir: „Það er svo sannarlega tilefni til þess að hrósa öllu því fólki sem hefur komið að þessari miklu og flóknu framkvæmd. Sérstaklega langar mig að nefna Ístak sem hafa þrátt fyrir gríðarlegar kostnaðarhækkanir vegna ytri áhrifa tekist að halda kostnaði innan ásættanlegra marka. Auðvitað viljum við ekki fara yfir samþykktar áætlanir en það er mikilvægt að hafa í huga að á verkefnatímanum, sem spannar yfir tíu ár, hefur gengið yfir Covid faraldur, stríðsátök og stíflaðir skipaskurðir með tilheyrandi röskun á aðfangakeðjum. Þá má nefna að sem dæmi hækkaði stálverð nánast tvöfalt á sama tíma og verið var að kaupa inn helling af stáli í húsið. Flutningsverð í sumum tilfellum fjórfölduðust og svo mætti lengi telja. Ég tel því að framkvæmdaraðilar hafi gert afskaplega vel í verkefni sem ekki eru mörg fordæmi fyrir hér á landi."

Sævar segir mikilvægt að öll Orkuveitan sameinist nú undir sama þaki.

„Nú erum við komin með frábær ný skrifstofurými í höfuðstöðvum okkar sem öll geta nýtt sér. Þó kostnaðurinn sé auðvitað hár erum við með í höndunum frábæran vinnustað og mun betri nýtingu en var á gamla húsnæðinu. Það hefur tekist afar vel til að hanna eftirsóknarverðan vinnustað og þó leiðin hafi verið löng og á köflum erfið er óhætt að segja að niðurstaðan sé hin glæsilegasta. Ég er ekki í nokkrum vafa um að þessar breytingar muni gera frábæran vinnustað enn betri.“