Notkun á heitu vatni eykst

Starfsemi hitaveitu Veitna á höfuðborgarsvæðinu er með eðlilegum hætti en notkun á heitu vatni eykst stöðugt með kólnandi veðri. Klukkan 17:00 í dag var rennslið á heitu vatni komið í 14.900 rúmmetra á klukkustund (m3/klst) og búist er við að það verði um 15.500 m3/klst á miðnætti. Á morgun er búist við stigvaxandi aukningu en mesta álagið á hitaveituna verður í hádeginu á laugardag. Gangi veðurspá eftir stefnir í að notkunin verði þá komin upp undir 18.000 m3/klst sem slær út fyrra met sem er 17.000 m3/klst.